Жаңалықтар

2011 жылдың 11 ақпан күні әл-Фараби атындағы Қазақ ұлттық университетінің бірінші проректоры, химия ғылымдарының докторы, профессор Мұқаш Мырзабайұлы Бүркітбаев химия факультетінің дәстүрлі ғылыми семинарында «Radioecological condition in the territory of Kazakhstan» тақырыбында баяндама жасады.

Әл-Фараби атындағы Қазақ Ұлттық университетінің оқытушы-профессорлары, докторанттар, магистранттар мен студенттер Ыстамбұл қаласында орналасқан Мимар Синан университетінің профессоры, тарих ғылымдарының докторы Абдіуақап Қарамен бас қосты.Бас қосудытарих факультеті ұйымдастырды.

Ө.А. Жолдасбеков атындағы математика бойынша халықаралық зерттеу жұмыстарының байқауы ғылымға бейімі бар дарынды оқушылар арасында өткізіледі. Бұл шара математика саласында білікті де, зерек балаларды анықтау және қолдау мақсатында ұйымдастырылып отыр. Аталмыш байқау атақты ғалым Өмірбек Жолдасбековтың атына бағышталып, негізін қалаған тұлға әл-Фараби атындағы ҚазҰУ-да өткізілетін болады.

8-ші ақпанда ҚазҰУ-да әл-Фараби атындағы Қазақ ұлттық университеті мен Алматы қалалық аймақтық қаржы орталығы қызметін реттеу Агенттігі арасында "Білім саласындағы серіктестік" туралы келісім-шартқа салтанатты түрде қол қойылды.

Ел тәуеліздігінің 20 жылдық мерейтойымен тұспа-тұс келген 2011 жыл ең айтулы дүбірлі дода - VII қысқы Азия ойындарын өткізумен басталды. Көне Азия құрлығын ғана емес, әлем назарын өзіне аударған бұл мереке де бір күндей болмай өте шықты. «Еуразия жүрегіне айналған елордамыз - Астанда жағылған Азияда алауымен қимай қоштастық», - дейді ҚазҰУ-дың Жастар ұйымдарымен жұмыс жөніндегі бөлім бастығы Меңдігүл Ноғайбаева.

ҚазҰУ-дың халықаралық қатынастар факультетінде әдістемелік бюроның бастауымен тіл оқыту методикасына арналған дәрістер басталды.

7-9 ақпан күндері «Green Way» жастар бастамасы шеңберінде «Мені өшір!» атты су мен электр энергиясын үнемдеуге арналған акция өтті. Акция барысында су және электр ресурстарын үнемді пайдалануға шақырған жаппай үгіттеу шарасы жүргізілді. «Тірі» электр шамы барлық студенттерге өзін өшіріп жүру керектігін айтып, көпшіліктің назарына ілікті. Ал, «электр шамының» достары, яғни «Green Way» қозғаласының мүшелері су крандарына «Мені өшір!» деген ескертпесі бар қағаздарды алып шықты.

Әл-Фараби атындағы ҚазҰУ шығыстану факультетінің қытайтану кафедрасы жанынан құрылған «Жас қытайтанушы» үйірмесінің жетекшілері «Жас ғалым мінбері» тақырыбында факультет студенттері мен жас ғалымдардың кездесуін ұйымдастырды.

7 ақпан күнгі ректораттың кезекті отырысы әл-Фараби атындағы ҚазҰУ-да ұжымдық мәдениетті арттыру жолдары мен білім беру саласын ізгілендіру тетіктерін қарастырды. Осыған байланысты, басты баяндаманы философия және саясаттану факультетінің деканы Ақтолқын Құлсариева жасады.

Студентті оқытып, маман даярлау үшін оқытушы алдымен оқу үдерісінің дұрыс жүргізілуін жетік меңгеруі керек. Бұл тұста педагогикалық қабілеттілік пен ұстаздық өрелік қажет. Мұндай кәсібилікке бірден бір себеп болатын орта педагогикалық кафедра. Философия және саясаттану факультетінің жалпы және этникалық педагогика кафедрасының 70-жылдық мерейтойына орай ұйымдастырылған алқалы жиын осы қағиданы дәлелдей түсті.

“Классикалық және зерттеушілік университеттердегі педагогика: даму келешегі, болмысы және тенденциялары” тақырыбындағы дөңгелек үстелге п.ғ.д., А.И.Герцен атындағы Ресей мемлекеттік педагогикалық университетінің профессоры С.Ю.Трапицын, ҚР педагогика ғылымдары академиясының президенті, Қазақ мемлекеттік қыздар педагогикалық университеті педагогика кафедрасының меңгерушісі, профессор А.Құсайынов, Абай атындағы Қазақ ұлттық педагогикалық университеті педагогика кафедрасының меңгерушісі, п.ғ.д., профессор Л.Керімов, Білім беру жүйесі басшы және ғылыми-педагогикалық кадрлар біліктілігін арттыратын Республикалық институттың директоры, профессор Г.Ахметова бастаған педагог ғалымдар мен кафедраның ардагер ұстаздары қатысты. Дөңгелек үстелдің алғы сөзін алған философия және саясаттану факультетінің деканы Ақтолқын Тұрлыханқызы келген қонақтарға алғысын жеткізіп, жалпы және этникалық педагогика кафедрасына деканат атынан ноутбук сыйға ұсынды. Факультет деканы Ақтолқын Құлсариева: “Ардагер ұстаздарымызды осы факультеттің киесі деп санаймыз. Сіздер маман даярлауда ізгі жол қалыптастырып бердіңіздер”, - деген лебізімен бөлісіп, талай жылдар бойы аталмыш кафедрада еңбек етіп, маман тәрбиелеуде аянбай тер төккен ардагер педагогтарды “Құрмет граммотасымен” марапаттады.