Кемел тұлға

ҚазҰУ-да әйгілі жазушы, журналист Кемел Тоқаевтың туғанына 95 жыл толуына орай өмірі мен шығармашылығына арналған «Кемел Тоқаев – жазушы, журналист, қайраткер» атты ғылыми-тәжірибелік конференция өтті.

Жиынды ашқан ҚазҰУ ректоры Ғалым Мұтанов «Әдебиетіміздегі тың салаға түрен салған қарымды қаламгердің, журналистердің талантты толқынын тәрбиелей отырып, кәсіби қазақ тілін қалыптастыруға, әсіресе заңға байланысты атау сөздерді бір ізге түсіруге, мемлекеттік терминология комиссиясынан өткізуге белсене араласқан мемлекет қайраткерінің өміршең туындылары бүгінгі күн рухымен үндесіп, отаншыл жас ұрпақтың рухани игілігіне айналып отыр», - деді ректор.

Кемел Тоқаев 1923 жылы 2 қазанда Алматы облысы Қаратал ауданында туған. Ұлы Отан соғысының ардагері. 1948 жылы Қазақ мемлекеттік университетін журналистика мамандығы бойынша бітірген. «Лениншіл жас» (қазіргі «Жас Алаш»), «Қазақстан пионері» (қазіргі «Ұлан»), «Социалистік Қазақстан» (қазіргі «Егемен Қазақстан») газеттерінде жауапты қызметтер атқарған.

Көрнекті жазушы, қазақ детектив жанрының өркендеуіне үлес қосқан Кемел Тоқаев «Жұлдызды жорық», «Қыс қарлығашы», «Түнде атылған оқ», «Қастандық», «Арнаулы тапсырма», «Сарғабанда болған оқиға», «Таңбалы алтын», «Соңғы соққы», «Солдат алысқа кетті», «Ұясынан безген құс» сияқты туындылардың авторы.

Жиында сөз алған Қазақстан Жазушылар одағының мүшесі, ақын Рафаэль Ниязбек «Кемел Тоқаев – өзі өмір сүрген қоғамның кескін келбетін шынайы көрсетіп, шытырман оқиғаларға желі етіп, сабақ алар, салмақты мұра қалдырған дарын иесі. Оның қаламынан туған еңбектерінде отаншылдық рух, ұлттық патриотизм тайға таңба басқандай анық көрініп тұр. Болашақ ұрпағына мәңгі өлмес мұра қалдырған тұлғаның туындыларынан бүгінгі буын нәр алып, сусындап өсіп келеді»,- деді ақын. Жиын аясында еліміздің көрнекті ғалымдары мен қоғам қайраткеркерлері артында өшпес із қалдырған Кемел тұлғаның өмірі мен отан алдындағы адал қызметі жайлы ыстық ықыласқа толы таусылмас естеліктерімен бөлісті. Ғылыми жиын барысында «Өнегелі өмір» сериясымен жазушы, журналист, мемлекет қайраткері, Ұлы Отан соғысының ардагері Кемел Тоқаевқа арналған кітаптың тұсаукесер рәсімі болып, жиын соңында Кемел Тоқаевтың өмірі мен шығармашылығына арналған студенттер, магистранттар, PhD-докторанттар мен жас ғалымдар арасында жарияланған байқау жеңімпаздарына шәкіртақылар табысталды.

Баспасөз қызметі