Берлин техникалық университетіндегі тағылымдама

Әл-Фараби атындағы ҚазҰУ механика-математика факультеті механика кафедрасының 24 магистранты Берлин техникалық университетінде (Берлин, Германия) «Халықаралық ғарыш мектебі» бағдарламасы бойынша шетелдік тағылымдамадан өтті.

10 күнге созылған тағылымдама барысында К. Брисс, М. Орлов Д. Галайко, Н.Рэмбо сынды алдыңғы қатардағы ЖОО-ның жетекші профессорларының дәрістері тыңдалды. Аталмыщ дәрістер серіктік жүйелерге шолу, СТК-ға кіріспе, аспан механикасы және ғарыштық динамика, серіктік шағын жүйелер, тексеру жүйесі, деректерді өңдеу негіздері, наносеріктерді бағдарлау және басқару жүйесі, наноспутниктік жобалау әдістемесі, жаһандық тұрақты инновациялар деген кең ауқымды тақырыптарды қамтып, танымдық ақпараттары мол әрі өте пайдалы болды. 

Сонымен қатар заманауи «Өнертапқыштық мәселелерін шешу теориясы» бойынша профессор М. Орловтың шеберлік сабағы өтті. Шара соңында магистранттар заманауи ТРИЗ шеберлік сабақтарына қатысқандары туралы сертификаттармен марапатталды.

Және де Тағылымдама бағдарламасы маңызды таныстырылымдық бөлімді қамтыды. Нойштерлиц қаласындағы (Германия) DLR неміс аэроғарыштық орталығына экскурсия жүргізілді. Экскурсия барысында аэроғарыштық орталығының мамандары орталықта орналасқан серіктер туралы әңгімелеп берді. Олар теңіздегі ахуал туралы хабардар ету, ионосфералық мониторинг пен болжау орталығы, теңіздегі навигацияның қауіпсіздігі мен нақтылығы туралы қашықтықтан зондтау туралы әңгімеледі.  Сондай-ақ  магистранттар Рейхстагты, Бранденбург қақпаларнын да көріп қайтты.

www.kaznu.kz