Академик Төлеген Қожамқұлов – 75 жаста

Әл-Фараби атындағы Қазақ ұлттық университетінде ҚР ҰҒА академигі, физика-математика ғылымдарының докторы, профессор, Қазақстанның еңбек сіңірген ғылым және техника қайраткері, Әл-Фараби атындағы ғылым мен техника саласындағы Мемлекеттік сыйлықтың лауреаты Төлеген Қожамқұловтың 75 жылдық мерейтойы өтті.

Салтанатты жиынды ҚазҰУ Басқарма басшысы – Ректоры Жансейіт Түймебаев ашып, Қазақстан Республикасының Тұңғыш Президенті – Елбасы Нұрсұлтан Назарбаевтың құттықтау хатын оқып берді.

Елбасы лебізінде «Cіз зерделі зерттеуші, шебер ұйымдастырушы ретінде өз қабілетіңізбен жастай танылып, ғылым әлеміне ерте араластыңыз. Көрнекті ғалым болып қалыптасып, әсіресе теоретикалық физиканың дамуына аянбай атсалыстыңыз. Жоғары мектеп саласында еселі еңбек етіп, бірқатар оқу орындарының, соның ішінде еліміздің жетекші оқу ордасы – әл-Фараби атындағы ҚазҰУ-дың ректоры лауазымын абыроймен атқардыңыз» дей келе, академиктің Білім беру ісінің өркендеуіне, тәуелсіздігіміздің нығаюына қосқан үлесі атап өтілген.

Сондай-ақ мерейтой иесінің атына Қазақстан Президенті Қасым-Жомарт Кемелұлы Тоқаевтың атынан да құттықтау хат келіп түсті. Мемлекет басшысы «Халқымыз өзіңізді белгілі қоғам қайраткері, көрнекті ғалым, іскер азамат ретінде жақсы біледі. Еліміздің іргелі жоғары оқу орындарын басқарып, жас ұрпақтың білікті маман болып шығуы үшін бар күш-қайратыңызды жұмсадыңыз. Жүйелі жұмыстың нәтижесінде игілікті істерді жүзеге асырдыңыз. Ғылым мен білім жолында қол жеткізген табыстарыңыз өте мол. Физика және математика саласын терең зерттеп, отандық ғылымның дамуына үлес қосып келесіз» деп, алдағы уақытта да Отанымыздың өркендеуіне атсалысып, өмірде арман-мақсаттарға жете беруіне тілектестігін білдірген.

ҚР Сенатының төрағасы Мәулен Әшімбаев та өз хатында біртуар тұлғаның қоғамдағы орны мен ғылымдағы жетістігін атап өтіп, қуанышқа ортақтастығын жеткізген.

Парламент Мәжілісінің Төрағасы Нұрлан Нығматуллин көрнекті тұлғаның туған күніне депутаттар атынан бейнеқұттықтау жолдап, Төлеген Әбдісағиұлының мәртебесін тағы бір биікке көтерді.

«Сіз бүкіл өміріңізді ғылымға арнап, туған елдің, туған жердің білім және ғылым саласының дамуына үлкен үлес қосқан танымал тұлғалардың бірісіз. Сіз жас кезден бастап ерекше қабілетіңіздің арқасында 13 жаста оттай жанып, алғашқы медальға ие болдыңыз. Осыдан басталған бүкіл өмір жолыңызда әрқашанда биіктен көрініп, жеңістерге жеттіңіз. Бүгінде еңбекке адал, мақсатқа берік, батыл мінезіңіздің арқасында ғылыми жаңалықтар ашып, әлемге танымал белгілі тұлға атандыңыз. Сонымен бірге Қазақстанда атақты ректор ретінде зор құрметке ие болдыңыз» дей келе, ұлт мақтанышының әлі де халқына бергенінен берері көп екендігіне сенім білдірген.
Нұрлан Зайроллаұлының сый-сияпаты мен жылы лебізін ҚР Парламент мәжілісінің Халықаралық істер, қорғаныс және қауіпсіздік комитетінің хатшысы Ерман Мұхтар Тілдәбекұлы тапсырды.

Қазақстан Республикасы Президентінің Әкімшілігі Басшысының бірінші орынбасары Дәурен Абаев өз құттықтауында "Өзіңізді көпшілік отандық ғылымды дамыту ісіне зор үлес қосқан ғалым, көрнекті ғылым және қоғам қайраткері ретінде жақсы біледі.
Сіз әр жылдары еліміздің іргелі білім ордаларын үлкен абыроймен басқарып, Ұлттық ғылым академиясында табысты еңбек еттіңіз. Өскелең ұрпақтың бойына парасаттылық пен ғылым-білімге деген сүйіспеншілікті дарытып, қазақстандық ғылымның алға басуына өлшеусіз еңбек сіңірдіңіз.
Бірқатар маңызды мемлекеттік наградалар мен Әл-Фараби атындағы Қазақстан Республикасының ғылым мен техника саласындағы мемлекеттік сыйлығының лауреаты атануыңыз – ел игілігі жолында жасаған қажырлы қызметіңіздің лайықты бағасы деп білеміз" деп атап өткен.

Қазақ ғылымының ардагеріне Жамбыл облысының әкімі Бердібек Сапарбаев та ақжарма тілегін арнады.
Аймақ басшысы «Сіз еңбек жолыңызда көптеген белестерден өтіп, қарым-қабілетіңіз бен біліктілігіңізді байқата білдіңіз. Түрлі жауапкершілігі мол қызметтерде елеулі еңбек етіп, ел дамуына өз үлесіңізді қостыңыз. Соның арқасында физика-математика ғылымдарының докторы, профессор, Қазақстан Республикасының Ұлттық ғылым академиясының академигі атандыңыз. Бүгінде мемлекет және қоғам қайраткері Гүлмира Истайбекқызы екеуіңіз елімізді әлемге танытып жүрген Рахат-Биді тәрбиелеп, өнерге баулып келесіздер. Парасатты перзенттеріңіз дара дарынымен бала кезден-ақ көптің көзайымына айналып, биік белестерді бағындыруда десек, бұл Сіздерден дарыған тектіліктің бір белгісі екендігі сөзсіз, – дей отырып, әрдайым ұлағатты істердің ұйытқысы болып, абырой биігінен көрінуді тілеген.

Қызылорда облысының әкімі Гүлшара Әбдіхалықова:
– Сіз Елбасының бастауымен Тәуелсіз Қазақстанның қалыптасуына, әлеуметтік-экономикалық және рухани өсіп-өркендеуіне ерекше еңбек сіңірдіңіз. Әсіресе, еліміздің білім және ғылым саласының дамуына физика-математика ғылымдарының профессоры ретінде қосқан айрықша үлесіңізді құрметтеймін. Өзіңіздің біліктілігіңіз бен біліміңізді, тәжірибеңізді еліміздің дамуына жұмсап, ел үшін маңызды бастамаларға мұрындық болып, игі істердің басында жүре беріңіз, - дей келе, біртуар тұлға бағындырған белестер кейінгі жастарға үлгі-өнеге екеніне тоқталған.

Ал ғалымның өнегелі өмірі мен ғылым жолы туралы ҚазҰУ-дың ғылыми-инновациялық қызмет жөніндегі проректорының міндетін атқарушы Тілекқабыл Рамазанов  баяндама жасады. 

Сонымен қатар,  ҚР Конституциялық Кеңесінің төрағасы Қайрат Мәми, ҚР Білім және ғылым министрі Асхат Аймағамбетов, Алматы қаласының әкімі Бақытжан Сағынтаев, ҚР ҰҒА президенті, академик Мұрат Жұрынов және тағы басқа қоғам қайраткерлері мен замандастары жолдаған ақ-тілектер оқылып, сый-сияпаттары тапсырылды.

Жиын соңында Төлеген Қожамқұлов мерейтойымен арнайы құттықтаған Елбасыға, Президентке және басқа барлық азаматтарға жүрекжарды алғысын білдірді.  

Әл-Фараби атындағы ҚазҰУ-дың Баспасөз қызметі