Университет комиссиясы өз қорытындыларын жариялады

20 маусымдағы ректорат мәжілісі «Хабар» телеарнасындағы «Қазақшаңыз қалай?» бағдарламасында жеңіске жеткен студенттерді ректордың құттықтау, марапаттауымен басталды. Республикалық университетаралық жарыста ҚазҰУ-дың «Достар» тобы қазақ тілін жетік меңгергендерін дәлелдеп, алғырлық танытып, 1-орынды иеленді. Топ құрамында филология факультетінен Жанна Верещак, Дина Тильман, Анастасия Перетьятко, Дарья Жигальцова, Нигара Бавдинова, Азиза Даутова, Жұлдыз Абдуллаева және халықаралық қатынастар факультетінің студенті Александра Юрченко бар.

Мәжіліс әдеттегі тәртібі мен жоспары бойынша жалғасты. Кафедралардың оқу және әдістемелік поценциалы жөнінде Науқан Асановтың баяндамасы тыңдалды. Мемлекеттік тілде оқытылатын пәндердің оқу-әдістемелік құралдармен жабдықталу жағдайы мен келесі оқу жылында ретке келтіруге тиісті бағыттарға тоқталды.

Сонымен қатар, ғылыми жұмыс жөніндегі проректор Тілекқабыл Рамазанов өз ақпарында ҚазҰУ-дың ғылыми-инновациялық құрамын жасаушы кафедралардың рейтингісіне шолу жасап, қорытынды есептерімен таныстырды. Зерттеу университетіне айналуда проректор Тілекқабыл Рамазанов барлық факультеттердің кафедраларын 2008-2011 жылдар аралығындағы уақытпен, негізгі 3 талап бойынша қарастырған. Әлемдік зерттеу университеттерінің көрсеткіштерін негізге ал отырып, кафедралардың ғылыми бағыттағы көрсеткіштері белгіленіп, алдағы уақытта ғылыми-инновациялық зерттеу жұмыстарын арттыру жолдары айтылды.

Оқу жылының соңы болғандықтан, Бірінші проректор Мұхамбетқали Бүркітбаев 2011-2012 оқу жылына арналған кафедралардың құрылымдық бөлімдері мен оқытушы-профессорлар құрамының рейтингісін қарастырған. Университет комиссиясының кафедралардың оқу-әдістемелік, ғылыми-инновациялық қызметі мен оқытушы-профессорлар құрамы, факультет пен кафедралардың өзін-өзі бағалау анкетасының қорытынды жұмыстарына берілген бағасы арнайы дайындалған слайдтан көрсетілді.

ҚазҰУ-дың Баспасөз қызметі