ҚазҰУ Қазақстандағы жоғары оқу орындары арасында оқу гранты көлемімен ерекшеленді

Биыл әл-Фараби атындағы Қазақ ұлттық университеті мемлекеттік тапсырыс бойынша 4 мың грантты иеленді, оның 2925 – бакалавриатта білім беріп даярлауға арналса, 933 – магистратура, 143 – PhD докторантураға берілген. Университетке Білім және ғылым министрлігі өткен жылмен салыстырғанда биыл оқу гранттарын магистратура мен PhD докторантураға екі есесге көбейтіп отыр.

Қабылдау комиссиясына 2010 жылы барлығы – 7,5 мың талапкер тапсырса, 2011 жылы - 7,9 мың талапкер өтініш тапсырған.

Сараптама нәтижесіне сүйенсек, талапкерлер тарапынан инженер мамандығына және ғылыми-жаратылыстану бағытына сұраныс артып отыр.

Сұранысты ескере отырып, университетте жаңа мамандықтар ашылды. Олар: нанотехнология, логистика, космос техникасы мен технологиясы, дизайн, есептеу техникасы және бағдарламалық қамтамасыз ету, геология және табиғатты пайдалану және т.б.

ҚазҰУ-дың зерттеу университетіне айналуы оқу орнының барлық қызметін қамтыды. Түбегейлі ауысу ең әуелі факультеттерден басталды. Қазір олар кластерлік тұрғыдағы негізге сай жасалған. Әсіресе, оқу мен ғылым кеңістігі кеңейгені талапкерлерді қызықтыруда. Мысалы, химия факультеті қазір «химия және химиялық технология» деп аталса, физика факультеті - «физика-техникалық», биология факультеті – «биология және биотехнология», география факультеті – «география және табиғатты пайдалану», тарих факультеті – «тарих, археология және этнография», филология факультеті – «филология, әдебиеттану және әлем тілдері» және т.б.

Сондай-ақ, жаңа жоғары оқу орнына дейінгі дайындық факультеті ашылды.

ҚазҰУ-да студенттерді біліктілікті арттыру арқылы оқытудың жаңа модульдік технологиялары енгізіліп, бұл жұмыс берушілердің талаптарын да ескере отырып жасалынған.

Жаңа оқу жылында университет жанынан жоғары сынып оқушыларына арнайы мектеп-лицей ашылады. Еліміздегі беделді университетінде оқып, білім алғысы келетіндер үшін бұл үздіксіз білім алуда, әлемдік еңбек нарығында жоғары білікті маман болу үшін үлкен мүмкіндік: «мектеп-лицей – колледж – бакалавриат – магистратура – докторантура PhD».

ҚазҰУ-дың Баспасөз қызметі