Саяси реформаларға саясаттанушы-сарапшылар пікірі

Әл-Фараби атындағы Қазақ ұлттық университетінде «Саяси реформалар 5.0: сарапшылар көзқарасы» тақырыбында дөңгелек үстел өтті. Оған танымал ғалымдар мен сарапшылар, саясаттанушылар, оқытушы-профессорлар және  білім алушы жастар қатысып, Президент Қасым-Жомарт Тоқаевтың «Жаңа Қазақстан: жаңару мен жаңғыру жолы» атты жолдауын талқылады.

Шараны Әл-Фараби атындағы ҚазҰУ-дың философия және саясаттану факультеті ҚР Президенті жанындағы Қазақстанның стратегиялық зерттеулер институтының Алматы қаласындағы өкілдігімен бірлесе ұйымдастырды.

ҚазҰУ-дың философия және саясаттану факультетінің деканы Бекжан Мейірбаев қатысушыларға арнап сөз сөйлеп, белсенділік үшін алғыс білдірді.

 Жиынға «Альтернатива» өзекті зерттеулер орталығының директоры А.Чеботарев, «Стратегия» әлеуметтік және саяси зерттеулер орталығының президенті Г.Ілеуова, Саяси зерттеулер қауымдастығының президенті Е.Алияров, ЖСДП партиясы төрағасының орынбасары А.Алибаев, ҚР БҒМ ҒК ФСДИ саяси зерттеулер орталығының директоры А.Амребаев, саясаттанушы, DKU профессоры Р.Бурнашев, саясаттанушы, халықаралық журналист, «Мир Евразии» (ҚР) қоғамдық қорының президенті Э.Полетаев, саясаттанушы, қоғам қайраткері, тәуелсіз сарапшы М.Шибутов шақырылды.

Спикерлер Президент айтқан маңызды өзгерістер қоғамның және  Қазақстандағы демократиялық жаңғыруға ықпал етуі тиіс «Халық үніне құлақ асатын мемлекет» тұжырымдамасының сұраныстарына қаншалықты жауап беретіні туралы пікірлерімен бөлісті.

Саяси зерттеулер қауымдастығының президенті Алияр Есенжолов қазіргі уақытта жаңа Қазақстанның құрылысы емес, оны жаңғырту жүріп жатқанын айтты. «Мықты Президент – беделді Парламент – есеп беретін Үкімет» формуласын сыни тұрғыдан қарастыра отырып, саясаттанушы адал сайлау, күшті үкімет құратын партиялар қажеттігі туралы ойын білдірді. «Мықты Президент – бұл мықты Парламент, азаматтық қоғам және Үкімет, – деп атап өтті А.Есенжолов. – Оларды кім қалыптастырмақ? Халық – Конституцияға сәйкес, елдегі жоғары биліктің иесі. Әрбір азамат мемлекетті, саяси жүйені жаңартуға тартылмайынша, біз табысқа жете алмаймыз. Мұны қалай жасауға болады? Жағдай жасалуы керек – адал сайлау, аумақтық комиссия құру, сайлауды нақты бақылау, соңында Үкімет құра алатындай партиялар құру. Басқа формула жоқ».

ҚазҰУ-дың Саясаттану кафедрасының меңгерушісі, саясаттану ғылымының докторы, профессор Гүлнар Насимова тыңдаушыларға әлеуметтік желілерге мониторинг жүргізу арқылы жүргізілген зерттеу нәтижелерін ұсынды. Қазақстандықтардың Президент жолдауын қалай қабылдағаны және оның негізгі жаңалықтары туралы қоғамдық көңіл күй анықталды. Шолулардың жалпы тоналдығы оң, реформаны қолдайтын көптеген пікірлер бар. Алайда облыстарды әкімшілік қайта ұйымдастыру және Қапшағай қаласын Қонаев деп қайта атау туралы ұсынысты дер кезінде ұсынбаған деп санайтын сыншыл қазақстандықтар да бар.

Жолдауды талқылауға қатысушылар белсенді атсалысып, өз ойларын, сыни пікір мен ұсыныс-тілектерін де жеткізді. Сөз соңында алдағы реформалар оптимизмді оятатыны атап өтіліп, мемлекеттік машина тетіктері қозғалысқа келгені, демек, оң өзгерістерге үміттене аламыз деген қорытынды жасалды.

Әл-Фараби атындағы ҚазҰУ-дың Баспасөз қызметі