Әл-Фараби атындағы Қазақ ұлттық университетіне Ташкент химия-технологиялық институтының (ТХТИ) делегациясы жұмыс сапарымен келді. Тараптар әріптестікті нығайту мәселелерін талқылады.
Кездесуде ҚазҰУ-дың Басқарма Төрағасы – Ректоры Жансейіт Түймебаев білім ордасының жетістіктеріне тоқтала келе, Өзбекстанның 13 жоғары оқу орны және институтымен әріптестік орнағанын атап өтті.
![](/content/images/news/94973.jpg)
«Бізді Ташкент химия-технологиялық институтымен табысты ынтымақтастық біріктіреді. Алдағы уақытта да бірлескен ғылыми-зерттеу жұмыстарын орындау, атап айтқанда: химия және химиялық технология, тамақ технологиясы бойынша, сонымен қатар магистранттар мен докторанттар алмасу және олардың ғылыми жұмыстарына бірлесіп жетекшілік жасау бағытында әріптестік жалғаса береді», – деді университет басшысы.
Қазіргі уақытта Өзбекстанның 108 студенті бакалавриат және магистратура бойынша ҚазҰУ-да білім алуда. Оның 85-і мемлекеттік білім беру гранты бойынша, ал 23 студент келісімшарт негізінде оқиды. Өткен жылы ҚазҰУ магистранттары Ташкент химия-технологиялық институтында «Органикалық заттардың химиялық технологиясы» білім беру бағдарламасы бойынша ғылыми тағылымдамадан өтті.
![](/content/images/news/94974.jpg)
Бұған қоса, ҚазҰУ мен ТХТИ қызметкерлері ірі халықаралық конференцияларға екіжақты қатысып, өзара тәжірибе алмасуды жүзеге асырмақ.
Кездесуде ТХТИ ректорының стратегиялық жоспарлау және дамыту жөніндегі кеңесшісі Питер Макгэнн ҚазҰУ-мен ғылым және білім саласындағы ынтымақтастықтың маңызын ерекше атап өтіп, бірлескен жобалар мен бастамаларды іске асыруға дайын екенін білдірді.
![](/content/images/news/94975.jpg)
Сонымен қатар делегация құрамында ТХТИ халықаралық байланыстар бөлімінің басшысы Саидумархон Саидахмадов болды.
Жүздесуде қос тарап өз пікірлерін ортаға салып, екі университет ынтымақтастығының даму перспективаларын қарастырды.
Әл-Фараби атындағы ҚазҰУ-дың Баспасөз қызметі