БАҚ ҚазҰУ туралы

БАҚ ҚазҰУ туралы


21.10.2011 «ҚазАқпарат» Ұлттық ақпарат агенттігі

20.10.2011 / 18:30

БҰҰ-ның Қазақстандағы өкілдігі мен Әл-Фараби атындағы ҚазҰУ өзара ынтымақтастық жөніндегі меморандумға қол қойды

АЛМАТЫ. 20 қазан. ҚазАқпарат /Нәзира Елеухан/ - Бүгін Алматыда Қазақстан Республикасы тәуелсіздігінің 20 жылдығы мен БҰҰ-ның Қазақстандағы қызметінің 20 жылдығына орай

БҰҰ-ның Қазақстандағы өкілдігі және Әл-Фараби атындағы Қазақ ұлттық университеті ағарту, білім беру және мәдениет саласы бойынша өзара түсіністік және ынтымақтастық жайындағы меморандумға қол қойды.

Аталмыш меморандум негізінде, енді екі жақтың бірлескен қызметі - гуманитарлық, қоғамдық, экономикалық ғылымдар саласында ғылыми-зерттеу жобаларын дамытуға бағытталатын болады. Сонымен қатар, денсаулық сақтау және адами әлеуетті жоғарылату мәселелеріне зор көңіл бөлінбек.
18.10.2011 «Айқын» Республикалық қоғамдық-саяси газет

18 қазан, 2011 жыл

Тілекқабыл РАМАЗАНОВ, әл-Фараби атындағы ҚазҰУ-дың ғылыми-инновациялық жұмыс жөніндегі проректоры: Ең басты мақсат - әлемдік топ-университеттердің қатарына ену


- Тілекқабыл Сәбитұлы, Елбасы биыл «Болашақтың іргетасын бірге қалаймыз» атты Жолдауында «Біз университеттік білім мен ғылымды дамытуды жаңа деңгеймен қамтамасыз етуге міндеттіміз» деген болатын. Бұл үшін не істелінуі қажет? Осы бағытта жоғары білімнің қарашаңырағында қандай жұмыстар атқарылып жатыр?
- Елбасымыздың бұл идеясының астарында үлкен ой жатыр. Өйткені инновацияға негізделген экономиканы құру үшін ең бірінші бізге білікті мамандар керек. Ал кәсіби мамандарды беделді университеттер дайындайды. Әлемдік тәжірибеге сүйенсек, бұл бағытта ғылыми жетістіктер мен оқу үдерісі ұштастырылып, инновациялық құндылықтардың негізінде өте білікті де әлеуетті кадрлар даярланады. Жалпы, бұл - стратегиялық мәселе. Өркениетті мемлекеттердің қатарына қосылуды басты бағдар еткен дамушы мемлекеттер осы жолмен жүруі керек. Университетте қандай шаралар атқарылып жатыр дегенге келер болсақ, біз зерттеу университетіне айналуға байланысты толық бағдарлама жасап шықтық. Трансформациялық бағдарламаның құны - 45 млрд теңге. Дәл қазіргі уақытта бұл құжат үкімет деңгейінде баяндалып, мақұлданды.
Бағдарламаға сәйкес университетте құрылымдық күрделі өзгерістер жүргізіліп, үлкен жұмыстар атқарылды. Мәселен, бұрын бес-алты оқытушыдан тұратын кафедралар көп болатын еді, біз сол құрылымдарды біріктіріп, үлкен мамандандырылған ғылыми-зерттеу орталығымен пара-пар кафедралар жасақтадық. Жоғары оқу орнының негізгі өзегі, ғылыми айнасы, ол - кафедра. Осыған байланысты ендігі кезекте іріленген кафедра, жиынтықталған мамандықтардан кластерлер жасау алда тұр. Бұл жасалынған өзгерістерді ұжым жақсы түсініп жатыр. Шындығында бұл - біздің бүгін ғана жаңадан ойлап тапқан жобамыз емес, бұл - әлемдік тәжірибе. Яғни мұндай зерттеу университетіне айналуға біз бірден бара салған жоқпыз, әлемнің көптеген жоғары білім ордалары мен білім нарығын кеңінен зерттеп барып келіп отырмыз.
Өз кезегінде ғалымдардың шоғырлануы да өз жемісін бере бастады. Бір мысал айтайын, жақында ғана Білім және ғылым министрлігінің тарапынан үлкен жобаларды жүзеге асыруға байланысты байқау жарияланды. Мұндай жобаларға бұрындары гуманитарлық сала мамандары тарапынан ұсыныс беру өте төменгі деңгейде болатын, өйткені жақсы бір тақырыпты тұжырымдау үшін бірнеше ғылым докторлары мен профессорлардың күші керек. Іріленген орталықтардың жемісі сол, университет ұжымындағы мамандар тек қана гуманитарлық салалар бойынша құны 300 млн теңгені қамтитын түрлі жобаға қатысуға ниет білдірді. Жалпы соңғы үш айдың ішінде университет тарапынан жарияланған әртүрлі байқауға 22 миллиард тенгеден астам қаражатты қажет ететін жобалар ұсынылып отыр. Бұл біздің әлеуетіміздің зор екендігін және университетімізде істелінген құрылымдық өзгерістердің тиімділігін көрсетеді.
Елбасы өз Жолдауында алдымызға «2020 жылға дейін еліміздің екі университеті әлемдік топ-университеттердің қатарына кіру керек» деген меже қойды. Біздің тікелей жетістігіміз, осы Елбасымыз қойған міндеттерді орындау бағытындағы жұмыстардың нышаны деп ойлаймын. Бұдан ары қарай да қарқынды дамуды мақсат тұтып отырмыз.


17.10.2011 «ҚазАқпарат» Ұлттық ақпарат агенттігі

17.10.2011 / 13:52

Алматыда «Жастар. руханилық. Интеллектуалдық ұлт» аталатын ғылыми-теориялық конференция болады

АЛМАТЫ. 17 қазан. ҚазАқпарат /Ерлік Ержанұлы/ - Алматыда 19 қазанда әл-Фараби атындағы ҚазҰУ-дің философия және саясаттану факультетінде «Жастар. руханилық. Интеллектуалдық ұлт» деп аталатын халықаралық ғылыми-теориялық конференция болады.

Ол ҚР ҰҒА-ның корреспондент-мүшесі, философия ғылымдарының докторы, профессор Ағын Хайруллаұлы Қасымжановтың 80 жылдығына және оның рухани мұралары арқылы өскелең ұрпақты тәрбиелеудегі орнын көрсетуге, ақпараттық қоғамдағы интеллектуалды ұлттың қалыптасуының мәдени-философиялық негіздерін айшықтауға арналады. Бұл шара дәстүрлі А. Қасымжанов оқулары аясында ұйымдастырылып отыр. Оған биыл қазақстандық және АҚШ, Египет, Қырғызстан, Қытай, Ресей сияқты алыс-жақын шет елдерден қонақтар қатыспақ. Конферцения жұмысы - «Интеллектуалды ұлттың философиялық-мәдени негіздері», «Қоғамдағы заманауи жастар», «Ақпараттық қоғамдағы руханилық пен құндылықтар» деген тақырыптар бойынша жүрмек.
14.10.2011 «ҚазАқпарат» Ұлттық ақпарат агенттігі

14.10.2011 / 16:27

Мемлекетіміз үшін адам құқығы ең маңызды фактор - С.Тұрсынов

АЛМАТЫ. 14 қазан. ҚазАқпарат /Әділет Мұсахаев/ - Мемлекетіміз үшін адам құқығы ең маңызды фактор. Бұл жөнінде ҚР Президенті жанындағы Адам құқықтары жөніндегі комиссияның төрағасы Сағынбек Тұрсынов бүгін ҚазҰУ-де «2010 жылы Қазақстан Республикасындағы адам құқықтарының ахуалы туралы» баяндамалардың таныстырылымы кезінде мәлім етті.

Адам құқықтарының сақталуы, қорғалуы әсіресе, әлемге бейбітшілік брендімен танылып отырған қазақ елі үшін үлкен сын. Әсіресе, 2010 жылы ЕҚЫҰ-ға төрағалық еткен тұста адам құқықтарының сақталуы қандай, не атқарылды, қандай дамытар тұстары бар деген сауал арнайы мекемелердің бірегей жауабына айналды. Осыған орай бүгін ҚР Президентінің жанындағы Адам құқықтары жөніндегі комиссия Еуропалық қауіпсіздік және ынтымақтастық жөніндегі ұйымға төрағалығы тұсындағы адам құқықтарының сақталуын арнайы зерделеген баяндамаларымен бөлісті.
13.10.2011 «ҚазАқпарат» Ұлттық ақпарат агенттігі

13.10.2011 / 16:39

Қазақ тілінің көсегесін жастар көгертеді

АЛМАТЫ. 13 қазан. ҚазАқпарат /Әділет Мұсахаев/ - Ұлттық болмысты сақтап қалу үшін әркім өзінің тарихымен тәрбиеленуі керек. Өзінің ұлттық мәдениетімен, құндылықтарымен мақтануы қажет.

Бұл жайында жазушы-журналист Бейбіт Қойшыбаев ҚазҰУ студенттерімен кездесу барысында айтты.

Елбасы өз Жолдауында Қазақстан тұрғындарына қазақ тілін меңгерудің сапасын арттыруды талап етіп отырған тұста сол талап үдесінен шығуды оңтайландыруда жастар да қалыс қалмауы қажет. Осы бағытта бүгін әл-Фараби атындағы Қазақ ұлттық университеті Жастардың рухани орталығында қоғамдағы мемлекеттік тіл мәселесіне байланысты арнайы алқасөз өтті. Басқосуға студенттер, қоғамдық ұйым өкілдері қатысты.
12.10.2011 «ҚазАқпарат» ұлттық ақпарат агенттігі

12.10.2011 / 17:56

Белгілі фольклортанушы ғалым Сұлтанғали Садырбаев 80 жасқа толды

АЛМАТЫ. 12 қазан. ҚазАқпарат /Әділет Мұсахаев/ - Кеше филология ғылымының докторы, белгілі фольклортанушы ғалым, педагог Сұлтанғали Садырбаевтың 80 жасқа толған мерейтойы Алматыдағы Жамбыл атындағы Қазақ мемлекеттік филормониясында атап өтілді.

1951 жылы С. Киров атындағы Қазақ университетінің филология факультетінің 1 курс студенті С.Садырбаев ұлы классик М.Әуезовтің «Ақындар ағасы» романы бойынша оқырмандар конференциясында баяндама жасап, суреткердің алғысын алған. 1955 жылы «Абайдың эстетикасы» атты диплом жұмысына академик М.Әуезовтің жетекші болуы да білімді шәкіртінің дарындылығын, ғылымға бейімділігін танығандығы еді. Академик жазушының шапағаты болар, фольклор саласында кандидаттық, докторлық диссертациясын табысты қорғады.
12.10.2011 «ҚазАқпарат» Ұлттық ақпарат агенттігі

12.10.2011 / 14:32

ҚазҰУ-дың проректоры Евгений Ан Корея Республикасының мемлекеттік марапатына ие болды

АЛМАТЫ. 12 қазан. ҚазАқпарат /Әділет Мұсахаев/ - Әл-Фараби атындағы Қазақ ұлттық университетінің проректоры Евгений Анға Корея Республикасының мемлекеттік марапаты тапсырылды, деп хабарлады аталған универсиитеттің баспасөз қызметі.

Жапония, Қытай, АҚШ, Канада және әлемнің басқа да елдері бойынша марапатқа ие болған 11 қуаныш иегерінің арасында, Е.Ан - Қазақстан бойынша ғана емес, ТМД елдері бойынша жалғыз өкіл.

Оңтүстік Корея мен Қазақстан арасындағы қарым-қатынасты нығайтып, кеңейтуге қосқан үлесі үшін марапатты Корея Республикасының Премьер-министрі Ким Хван Сик Сеул қаласында арнайы табыс етті.

Марапатты табыстау барысында, Е.Ан қазақстандық және оңтүстік кореялық компаниялардың бірлескен жобаларының жүзеге асуына ерекше ықпал етіп жүргендігі ерекше аталды. Мәселен, 2010 жылы Өскеменде Қазақстан Президенті Нұрсұлтан Назарбаевтің қатысуымен «Prima-Zodiak» мәдени-сауықтыру кешені ашылды. Сондай-ақ ол POSCO, TAWON Сoppar және тағы да басқа компаниялардың жобаларына кеңес айтып, Қазақстандағы Кәрістер қауымдастығының мәдени шаралар өткізуіне қолдау танытып келеді.
12.10.2011 «Заң газеті» Республикалық күнделікті газет

12 қазан 2011

Гүлнәр СӘРСЕНБЕКОВА, әл-Фараби атындағы Қазақ ұлттық университетінің тәрбие жұмысы жөніндегі департамент директоры:

«Қазіргі жастардың ойы еркін және оны батыл жеткізе алады»

– Елбасы Нұрсұлтан Назарбаев «Қазақстан-2030» Стра­те­гиялық бағдарламасында: «Жастарды қазақстандық па­т­рио­тизмге шығар­машылық жағынан дамыған жеке тұлға ре­тінде тәрбиелеу қажет. Бүгіннен бастап ұлттық мінез-құлық, биік талғампаздық, тәкаппарлық, тектілік, білімділік, биік талғам, ұлттық намыс қасиеттерін сіңіріп қалыптастыруымыз керек», – деп жастар тәрбиесіне ерекше мән берген. Осы орайда қарашаңырақ Қазақ ұлттық университетіндегі жастар тәрбиесінің жайы қалай?

– Біздің университет қашаннан білім мен ғылымның, өнер мен мәдениеттің қарашаңырағы. Ал­дың­ғы жылы университетіміздің 75 жылдығында сөз сөйлеген Ел­басының: «Әл-Фараби атындағы Қазақ ұлттық университеті Қазақ­стандағы әлемдік деңгейде кадр дайындайтын негізгі орталық», – деп атап өтуі де бұл оқу орнының салмағын сездірсе керек. Расында, еліміздің дерлік бар саласында 70-80 пайызға жуық біздің кадрлар отыр. Жоғары оқу орындары мемлекеттің даму қуаттылығының, зиялылығының көрсеткіші болып саналады. Қазір жаһандану жайлы жиі айтамыз. Жаһандануға жұтылып кетпес үшін өзіміздің бағыт-бағдарымызды ай­қындап, бет-бейнемізді сақтап қалу – бүгінгі басты міндетіміз. Бұл ретте жоғары оқу орындарының жас­тарға беретін білім мен тәр­бие­сінің рөлі зор десек, біздің уни­верситет осы талаптың биігінен көрінуде. Әл-Фараби атындағы Қазақ ұлттық университетінің қазіргі ұстанып отырған темірқазығы – бі­лім мен мәдениетті және тәрбиені ұштастыра отырып ұлттық құнды­лықтар арқылы адамзаттық құн­дылыққа бет бұру. Ұлттық ғылыми зерт­теу университетіне айналу да біздің оқу орнының негізгі мақсаты. Себебі, студенттердің білім мен ғы­лымды қатар игеруі керектігін Қазақстан Республикасының Білім және ғылым министрі Бақытжан Жұмағұлов ғылым туралы жаңа заң­да айқындап берді. Ғылымның зама­науи жүйесін енгізу қажет­ті­лігі­не баса назар аудар­ған министр білім берудің бар­лық деңгейінде білім беру мен ғылыми жұмысты біріктіру керек­тігін міндеттеп отыр. Бұл универ­си­тетіміздің негізгі жү­рер жолына айналмақ.
12.10.2011 «Айқын» Республикалық қоғамдық-саяси газет

12 қазан, 2011 жыл

Қалқаман Жұмағұлов – облыстың «Құрметті азаматы»

Әл-Фараби атындағы Қазақ ұлттық университеті ұжымының жиналысында елімізге және алыс-жақын шетелдерге белгілі тарихшы, тарих ғылымдарының докторы, «Құрмет» орденінің иегері, Білім беру саласының Құрметті қызметкері, академик Қалқаман Тұрсынұлы Жұмағұловқа мәртебелі дәреже – «Алматы облысының «Құрметті азаматы» атағы берілді. Осы жайлы облыстық мәслихаттың хатшысы Ардақ мауытқанұлы Сыдық: «Бұл мәртебе белгілі ғалым, академик ғалымға, әлеуметтік өмірге, халықтың мәдениеті мен рухани байлығына қосқан ерекше еңбегі үшін мәслихаттың шешімімен беріліп отыр» деді.

Қ.Жұмағұлов 1948 жылы қазіргі Алматы облысының Арасан елді мекенінде дүниеге келген. Орта мектепті бітіргеннен кейін С.Киров атындағы КазМУ-ге түсіп, оны үздік бағамен аяқтады. Ғалымның 40 жылдық ұстаздық мектебі осы университет қабырғасында қалыптасты. Танымал ғалым тарих факультетінің деканы болып екі мәрте сайланды. Қазір ол Дүниежүзі тарихы кафедрасының меңгерушісі болып қызмет етіп келеді. Шетелдің бірқатар университеттерінде неміс тілінде еуразия, Орталық Азия, Қазақстан туралы танымдық дәрістер оқыды. Геттинген университетінің құрметті профессоры, Жетісу мемлекеттік университетінің, сонымен бірге басқа да отандық университеттердің Құрметті профессоры атағына ие.
12.10.2011 «Айқын» Республикалық қоғамдық-саяси газет

12 қазан, 2011 жыл

БАҚ өкілдерінің басын қосты

ҚазҰУ ректоры, академик Ғалым Мұтанов пен Журналистика факультетінің деканы, профессор Есберген Алауханов бірқатар бұқаралық ақпарат құралдары өкілдерімен ынтымақтастық жөніндегі келісімшартқа қол қойды.

Үшжақты келісімшартқа Қазақстан журналистер одағының және Ұлттық баспасөз орталығының президенті Сейітқазы Матаев, «Мысль», «Ақиқат», «Үркер» журналдары мен «Қазақ газеттері» ЖШС президенті Жұмабек Кенжалин, «Жұлдыз», «Сын» және «Простор» журналдары, «Қазақ әдебиеті» газеті және «Ан-Арыс» баспасын біріктіретін «Қаламгер-Медиа» орталығы атынан «Қазақ әдебиеті» газетінің бас редакторы Жұматай Шаштайұлы, «Жас өркен» ЖШС бас директоры Жүсіпбек Қорғасбек, «Заң-медиа» корпорациясының президенті Досымбек Өтеғалиев, «Қазақ» радиосының бас директоры Ғалымжан Мелдеш және «Айқын» газеті бас редактордың орынбасары Ермахан Шайхыұлы қол қойды.

Меморандум негізінде арадағы әріптестік қарым-қатынас нығайып, бірлескен жобалар іске асырылмақ. Осы орайда «Қазақ газеттері» ЖШС бас директоры Жұмабек Кенжалин Журналистика факультетінің түлектері мен студенттерін жұмысқа қабылдауға ниетті екендігін айтты. «Айқын» газеті бас редакторының орынбасары Ермахан Шайхыұлы газет редакциясында журналистика факультетінің шәкірттеріне теорияны тәжірибемен бекітуге арналған зертханалық сабақтардың ұйымдастырылып тұратындығын тілге тиек етті.