Республикалық олимпиадада ҚазҰУ студенттері топ жарды

Абылай хан атындағы Қазақ халықаралық қатынастар және әлем тілдері университетінде жыл сайын өтетін "шет тілдер" мамандығы бойынша республикалық олимпиадада ҚазҰУ-дың студенттері топ жарды.

Аталмыш республикалық пәндік олимпиадада жапон тілі секциясы бойынша әл-Фараби атындағы ҚазҰУ шығыстану факультеті Қиыр Шығыс кафедрасының жапонтану бөлімінен биыл 10 студент қатысты.

Олимпиаданың бірінші турына жалпы саны 16 студент білім сынасты. Бірінші турда студенттер жапон тілі мен жапон әдебиеті бойынша тест жұмысын, сондай-ақ берілген тақырып бойынша жапон тілінде эссе жазды. Бірінші тур нәтижесі бойынша 8 студент келесі байқауға өтіп, жапон тілінде «Филологиялық зерттеулердегі мәдениетаралық қатынастың когнитивтік-тұжырымдық маңызы» атты тақырыпта жеке жоба жұмыстарының презентациясын жасады.

Екі тур қорытындысы бойынша үш жүлдені әл-Фараби атындағы ҚазҰУ-дың шығыстану факультеті, Қиыр Шығыс кафедрасы жапонтану бөлімінің студенттері иеленді. 

Атап айтар болсақ, 1-орынды 4 курс студенті Зере Бейсенбай, 2-орынды 3 курс студенті Қанапия Айтолқын, ал 3-орынды 3 курс студенті Меруерт Умешова иеленіп, арнайы диплом және сыйлықтармен марапатталды.

Жапон тілі секциясы бойынша Алматыдағы Мицубиши банкі өкілдігінің басшысы Х. Асано, Қазақстан-Жапония адам ресурстарын дамыту орталығының маманы А. Сегава, жапон тілі маманы Ю. Сегава, әл-Фараби атындағы ҚазҰУ жапон тілі оқытушылары М. Шадаева, С. Боранқұловалар төрелік етті. 

Қиыр Шығыс кафедрасы