«Ариана ауған орталығы» қоғамдық бірлестігі өкілдері келді

Алматы қаласы Ішкі саясат басқармасының қолдауымен шығыстану факультетінде «Ариана ауған орталығы» қоғамдық бірлестігі өкілдерімен кездесу өтті.

2009 жылдан бері «Ариана» білім мен мәдениетке қатысты істермен және Қазақстан аумағындағы ауған диаспорасы өкілдеріне заңдық және құқықтық көмек көрсетумен айналысып келеді. Бұл кездесудің модераторы белгілі журналист, мәдениеттанушы Бердалы Оспан болды.

«Ариана» орталығының төрағасы Ахмадулла Васток өз сөзінде Н.Ә. Назарбаевтың екі халық арасындағы достық, бейбітшілік пен өзара түсіністікті қолдаудағы маңызды рөлін атап өтті. Атап айтсақ, Қазақстан Ауғанстанмен кеден салығынсыз сауда жасауға мүмкіндік тудырды. Бұдан басқа, Ахмадулла Васток Н.Ә. Назарбаевқа ауған жастарын оқытуға 50 млн АҚШ долларын бөлгені үшін алғыс айтты, осы қаржының көмегімен 2010 жылдан бері 1000 студент білім алған және қазіргі күннің өзінде қосымша Ауғанстаннан келген 30 жас  дәріс алып жатыр. Осы орайда кездесуге қатысып отырған тарих, археология және этнология факультетінің студенттері оқу тәжірибесі шеңберінде елдің тарихи жәдігерлерін тереңірек зерттеу үшін Ауғанстанға бару мүмкіндіктері туралы сұрады. Шығыстану факультеті тарапынан да бұл мәселе студенттер мен шығыстану факультеті ирантану орталығының меңгерушісі Ғ.Т. Жумадилованың қолдауына ие болып, «Ариана ауған орталығы» қоғамдық бірлестігі өкілдеріне ауызша келісімдерді ресми түрде бекітіп, шығыстану факультетімен әріптестік туралы меморандумға қол қоюға ұсыныс жасалды.

«Ауғанстанның ең үлкен үниверситеті – Кабул университетінің АҚШ пен Еуропа елдерінің қолдауының арқасында қомақты бюджеті бар. Менің ойымша, егер ҚазҰУ-дың проректоры бастама көтерсе, Кабул университетімен келісімге келіп, әріптестік туралы меморандумға қол жеткізуге болады» - деді «Ариана ауған орталығы» қоғамдық бірлестігі төрағасының орынбасары Азизи Рахимулло Азизулло.

Бұл кездесу Ауғанстанның Қазақстандағы білім беру жүйесімен әріптестікке дайын екендігін, әл-Фараби атындағы ҚазҰУ-дың зерттеу географиясының кеңейгенінің оң нәтижесін толығымен көрсетті.

Шығыстану факультеті

www.kaznu.kz