Ғалымға құрмет

Әл-Фараби атындағы Қазақ ұлттық университеті филология және әлем тілдері факультетінде 2018 жылдың 23 қарашасында әл-Фараби атындағы Қазақ ұлттық университетінде Қазақстан Республикасының білімі мен ғылымына үлкен үлес қосқан, аса көрнекті әдебиетші ғалым, ұлағатты ұстаз, профессор, Қазақстан Жоғары мектеп Ұлттық ғылым академиясының, Халықаралық Айтматов академиясының академигі, Қазақстан Жазушылар Одағының мүшесі Жанғара Дәдебаевтың 70 жылдық мерейтойына арналған «ХХІ ғасырдағы филология ғалымдары : Ұлттық код және көркемдік таным» атты Халықаралық ғылыми-әдістемелік конференция өтті. Әл-Фараби атындағы Қазақ ұлттық университетінің ректоры, академик Ғ. Мұтановтың алғысөзімен ашылған конференцияда мемлекеттік және қоғамдық ұйымдардың: ҚР Парламенті Сенатының төрағасы Қ.Тоқаевтың, ҚР Парламенті Мәжілісі Төрағасының орынбасары Г.Исимбаеваның, ҚР Мәдениет және спорт министрі А.Мұхамедиевтің, Қазақстан Жазушылар одағы Төрағасы Ұ.Есдәулетовтың, «Нұр Отан» республикалық саяси партиясы төрағасының бірінші орынбасары М. Әшімбаевтың құттықтаулары оқылды. Конференцияға ҚР ҰҒА Шығыстану институтының директоры Ә. Дербісалиев, абайтанушы, ғалым М. Мырзахметұлы, М.Әуезов атындағы Әдебиет және өнер институтының директоры У. Қалижанов, академик А. Құсайынұлы, ақын Н.Оразалин, ақын Р. Ниязбеков, профессор Т.Тебегенов, профессор Б.Ыбырайымұлы, профессор Б. Карбозов, профессор А.Ісмақова, Г.Прәлиева сынды елімізге танымал ғалымдар мен қоғам қайраткерлері, Қазақстан ЖОО-ларының өкілдері қатысты. Академик Ж.Дадебаевтың өмірі және ғылым жолы туралы профессор Әнуар Тарақовтың баяндамасы тыңдалды. Профессор Ж.Дәдебаев Әл-Фараби атындағы ҚазҰУ-дың «Әл-Фараби» күміс медалімен, Евразия ұлттық университетінің «Күлтегін» медалімен, Тараз Мемлекеттік университетінің Мұхаммед Хайдар Дулати атындағы «Үздік табыстары үшін» төсбелгісімен марапатталды. Конференция барысында «Өнегелі өмір. Жанғара Дәдебаев» кітабының және профессор Ж.Дәдебаевтың жетекшілігімен Абай институты дайындаған «Абайтану: таңдамалы еңбектері» көптомдығының (І-ХХХҮІ томдар) тұсаукесері өтті.    

www.kaznu.kz