ҚазҰУ профессорының Женевадағы дәрісі

ҚазҰУ халықаралық қатынастар факультетінің дипломатиялық аударма кафедрасының меңгерушісі, профессор Алмаш Сейдикенова Женева университетінде (Швейцария) дәрістер курсын оқып, конференция өткізді.

Бұл университеттің негізі 1559 жылы құрылған және ол тарих пен  ғылыми дәстүрлері өте бай Еуропадағы ең танымал университеттердің бірі. Әлемдік «QS» рейтингінде 108-ші орынды алады. «Педагогика және психология» факультетінде магистранттар мен докторанттарға арналған дәрістер табысты өткізілді. Сонымен бірге, Женевадағы сапары барысында профессор А. Сейдикенова «Болон процесін қабылдағаннан кейінгі Қазақстанның білім беру жүйесі» конференциясын ұйымдастырды. Аталмыш шара аясында ол қатысушыларды ҚазҰУ қызметінің негізгі бағыттары және жетістіктерімен таныстырып, әріптестерін бірлескен зерттеулер жүргізуге, ал студенттерді Қазақстандағы жетекші университетіне академиялық алмасу бағдарламасы бойынша немесе тәжірибеден өтуге келуге шақырды.

Сапар барысында, сондай-ақ, профессор А. Ақкаримен бірге «Intercultural Approaches in Teacher Education: a Comparative and Exploratory Study Switzerland-Kazakhstan» атты жоба бойынша жұмыс жүргізіліп, қолданбалы лингвистика, ауызша және жазбаша аударма саласындағы ғалымдармен ғылыми байланыстар орнатылды.

Женева университеті профессор А. Сейдикенованың кәсіби еңбегін жоғары бағалап, ғалымды осы жылдың маусым айында қайтадан дәріс оқуға шақырды.

Дипломатиялық аударма кафедрасы

www.kaznu.kz