Механика-математика байқауы басталды

ҚазҰУ-да Ө. Жолдасбеков атындағы IX халықаралық механика және математикадан оқушылардың ғылыми-зерттеу жұмыстарының байқауы өтуде.

Дәстүрге айналған байқау атақты ғалым, көрнекті қоғам қайраткері Ө. Жолдасбековтің ескерткішіне гүл шоқтарын қоюдан басталды. Байқауға Қырғызстан, Тәжікстан, Әзірбайжан және Қазақстанның түрлі облыстарынан келген мектеп оқушылары қатысуда.

Алғы сөз алған ҚазҰУ ректоры Ғалым Мұтанов: «Өмірбек Жолдасбеков Қазақстан ғылымының дамуына өлшеусіз үлес үлес қосып, қыруар еңбек сіңірген тұлға. Ол осы оқу орданың іргетасын қалап, оны әлемдік деңгейге көтерді. Студенттерді даярлайтын жаңа мамандықтар, жаңа ғылыми-зерттеу орталықтар, зертханалар және ҚР Ұлттық Инженерлік Академиясының құрылуы Ө.Жолдасбековтың бастамасымен жүзеге асырылды. Оның бүкіл өмір жолы өнегеге толы. Сондықтан да бүгінгі байқауға келіп отырған жас буын тұлғамызды әрқашан ардақтап, еңбектерін бағалап жүргендігінің бір ғана көрінісі»,- деді ректор.

Сайыстың басты мақсаты – дарынды оқушыларды қолдау, олардың математика және механика ғылымдары саласындағы ғылыми-зерттеу жұмыстарына қызығушылықтарын арттыруға бағытталған. Дәстүрге айналған халықаралық байқауда жас таланттар 3 күн бойы өздерінің әртүрлі ғылыми жобаларымен зияткерлік сайысқа түседі.

Баспасөз қызметі

www.kaznu.kz