Әл-Фараби атындағы Қазақ ұлттық университетіне GIZ «Орталық Азиядағы зорлық-зомбылық экстремизмінің алдын алу» өңірлік бағдарламасының жетекшісі Штефан Бухмайер арнайы келді. Жүздесуде ортақ жоба аясындағы өзара ғылыми ынтымақтастық мәселелері талқыланды.
![](/content/images/news/83419.jpeg)
Кездесуде ҚазҰУ-дың Халықаралық ынтымақтастық департаментінің директоры Еркежан Апсеметова білім ордасының қызметімен таныстырып, басты жетістіктеріне тоқталды. «ҚазҰУ әлемнің 500-ден астам жетекші университетімен ынтымақтастық орнатқан, көптеген ірі халықаралық ұйымдардың құрамына кіреді және білім беру бағдарламалары мен ғылыми бағыттарының ауқымы аса кең», – деп атап өтті департамент директоры.
Мәртебелі мейман өз кезегінде «Орталық Азиядағы зорлық-зомбылық экстремизмінің алдын алу» жобасы аясындағы жемісті әріптестік үшін алғыс білдіріп, ықпалдастықты одан әрі жандандыру ниетін жеткізді.
![](/content/images/news/83420.jpeg)
Жоба бүгінгі таңда Қазақстан және Өзбекстан аумағында жүзеге асырылады. Ол мемлекет және азаматтық қоғамның зорлық-зомбылық экстремизміне төтеп беруін арттыруға тиіс шараларды қабылдауын қолдауға бағытталған. «Бұл мақсатта ғылыми-зерттеу университеттері бізге үлкен көмек көрсете алады. Әл-Фараби атындағы ҚазҰУ-дың ғылыми әлеуеті зор. Сол себептен өзара ықпалдастыққа мүдделіміз», – деді Штефан Бухмайер мырза.
Сонымен қатар кездесуге ҚазҰУ-дың халықаралық қатынастар факультетінің деканы Думан Жекенов қатысып, осыған дейін жобаға атсалысқан ғалым-оқытушылар жұмысын атап өтті.
Сөз соңында тараптар тиімді әріптестікті арттыру және жоба бойынша жұмыстарды ілгерілету үшін алдағы уақытта кездесулер ұйымдастыруға уағдаласты.
Әл-Фараби атындағы ҚазҰУ-дың Баспасөз қызметі