ҚазҰУ-ға Обуда университетінің делегациясы келді

Әл-Фараби атындағы ҚазҰУ-ға Венгрия астанасы Будапешт қаласындағы Обуда университетінің ректоры Левент Ковач бастаған делегация жұмыс сапарымен келді. 

          Венгрия делегациясының құрамындағы Бас директор Андраш Мольнар, «Alba Regia» техникалық факультетінің деканы Дьердь Георок, техникалық факультеті деканының орынбасары және Орталық Азия аймағының үйлестірушісі Моника Погатшник, Байланыс және баспасөз қызметі департаментінің жетекшісі Илдико Тот кездесуде болып, ҚазҰУ қызметімен танысты.

          Қазіргі уақытта ҚазҰУ Венгрияның 8 университетімен: Обуда университетімен, Янош Кодолани атындағы Қолданбалы ғылымдар университетімен, Сегед университетімен, Батыс Венгрия университетімен, Эстерхази Карои атындағы Колледжімен, Петер Пазман католик университетімен, Шопрон университетімен және Земмельвейс университетімен ынтымақтастық байланыс орнатқан.

          Айта кету керек, ынтымақтастық аясында соңғы жылдары 10 докторант пен 73 студент Венгрияның жоғары оқу орындарына тағылымдамадан өтті. Сондай-ақ осы кезеңде 20 оқытушы ғылыми жобалар бойынша Венгрия жоғары оқу орындарында халықаралық симпозиумдарға қатысты.

          Академиялық ұтқырлық аясында 2019-2020 оқу жылының көктемгі семестрінде Сегед университетінен 2 студент университеттің филология факультетінде «Қазақ филологиясы» мамандығы бойынша білім алды.

          Өз кезегінде венгриялық делегация ҚазҰУ басшылығына алғыс айтып, ортақ жобаларды нәтижелі жалғастыра беретіндіктерін айтты.

          Тараптар ғылыми және білім беру үдерісіне қатысты бірқатар мәселелерді талқылап, әріптестік байланыстарды жаңа бағытта дамытуға уағдаласты,одан әрі ынтымақтастық туралы уағдаласты.

 Әл-Фараби атындағы ҚазҰУ Баспасөз қызметі